Россия Мәгариф министрлыгы мәктәп укучылары өчен өй эшләрен башкаруга вакыт нормативларын раслады. 2–11 нче сыйныф укучылары өчен көненә бер ярымнан өч ярым сәгатькә кадәр чик билгеләнгән, ә 1 нче сыйныф укучылары өй эшләреннән тулысынча азат ителгән.
Сыйныфларга карап вакыт чикләре
Леднев исемендәге Мәгариф эчтәлеге һәм укыту методлары институты җитәкчесе Максим Костенко аңлатканча, билгеләнгән вакыт — көндәлек норма түгел, ә өй эшләрен башкару өчен рөхсәт ителгән иң югары чик. 2–3 нче сыйныфларда ул — бер ярым сәгать, 4–5 нче сыйныфларда — ике сәгать, 6–8 нче сыйныфларда — ике ярым сәгать. 9–11 нче сыйныф укучылары өйдә дәресләргә өч ярым сәгатьтән артык вакыт сарыф итмәскә тиеш. Нормативлар Роспотребнадзор белән килештерелгән һәм төрле яшьтәге балаларның психофизиологик үзенчәлекләрен исәпкә ала.
Беренче сыйныф укучыларына өй эше бирелми
Беренче сыйныф укучыларын өй эшләреннән азат итү нормасы 2021нче елда ук Россия Мәгариф министрлыгының №115 боерыгы белән билгеләнгән. Соңгы №729 боерык федераль белем бирү программасын әлеге кагыйдәгә туры китергән һәм өй эшләренә бер сәгатьлек чик турындагы техник сылтаманы төшереп калдырган. Максим Костенко билгеләп үткәнчә, беренче уку елы — баланың мәктәпкә ияләшү чоры, шуңа күрә бу вакытта өстәмә йөкләнеш кирәкми.
Россия мәгариф министры Сергей Кравцов Татарстанда узган мәгариф һәм фән хезмәткәрләренең август киңәшмәсендә өй эшләрен тулысынча бетерү каралмавын белдерде. Аның сүзләренчә, мөстәкыйль эшләү үтелгән материалны кабатлау өчен кирәк, әмма өй эшләренә карата гамәлдәге алымны камилләштерергә кирәк.
Нет комментариев