1 сентябрьдә Россиядә Белем көне билгеләп үтелә. Ул яңа уку елы башлануын символлаштыра һәм ил буенча миллионлаган укучы, студент һәм укытучыны берләштерә.
1 сентябрь уку елы башына әйләнгән
1930 нчы еллар уртасына кадәр Россия мәктәпләрендә уку елы башлануның бердәм датасы булмаган. Патша Россиясендә гимназияләр һәм югары уку йортларында дәресләр 29 августта башланырга мөмкин булган, башка уку йортларында исә сентябрь уртасында яки октябрьдә башланган. Авыл мәктәпләрендә уку елы кыр эшләренең тәмамлануына бәйле булганлыктан, балалар еш кына көз ахырында гына парта артына утырган. 1935 елның 3 сентябрендә СССР Халык Комиссарлары Советы һәм ВКП(б) Үзәк Комитеты карары белән барлык мәктәпләрдә уку елын 1 сентябрьдә башлау тәртибе кертелгән.
Белем көненең рәсми статусы
Башта 1 сентябрь гадәти уку көне генә булган: укучылар дәресләргә килеп, расписание буенча укый башлаган. 1984 елның 15 июнендә СССР Югары Советы Президиумы указы белән Белем көненә рәсми бәйрәм статусы бирелгән. Бәйрәмне һәм беренче кыңгырау традициясен кертү идеясе Краснодардагы мәктәп директоры, танылган совет педагогы Фёдор Брюховецкий исеме белән бәйле.
Бүгенге көндәге традицияләр
Хәзерге вакытта 1 сентябрьнең төп вакыйгасы — укучылар, ата-аналар һәм укытучылар катнашындагы тантаналы линейка. Анда дәүләт флагы күтәрелә, гимн яңгырый, мәктәп җитәкчелеге һәм хөрмәтле кунаклар котлау сүзләре әйтә. Бәйрәмнең кульминациясе — беренче кыңгырау: аны өлкән сыйныф укучысы һәм беренче сыйныф укучысы бирә.
2026 елда Белем көне сишәмбегә туры килә, яңа уку елында мәктәпләргә 17,5 млн нан артык укучы, шул исәптән якынча 1,5 млн беренче сыйныф укучысы киләчәк. 1 сентябрьдән Россия мәктәпләрендә яңартылган белем бирү программалары, яңа фәннәр һәм бердәм дәүләт дәреслекләре гамәлгә керәчәк.
Нет комментариев