Камашевлар гаиләсендә унынчы бала туды

Алексей белән  Лиянең бергә яши башлауларына  20 ел вакыт узды. Бу еллар эчендә алар алты ятим баланы үз гаиләләренә алып, үз канатлары астына сыендырдылар. Әле күптән түгел генә күп балалы Лия кабат әни булу бәхетенә иреште. Ире Алексей белән аларның дүртенче уртак балалары туды. Балага  Тимофей дип исем куштылар. Гаиләдә аны назлап, яратып, Тимоша дип эндәшәләр.

“Тимофей белән авырлы чагым күз ачып йомганчы узып китте, - дип искә ала Лия Камашева. – Улыбыз Семён барыбыздан да ныграк борчылды. Тимошага сатып алган һәр уенчыкны үзе тикшереп карады, безгә уйнап күрсәтте. Тимофей да безнең көтеп алган улыбыз. Аның тууына гаиләдә барыбыз да бик нык куандык.  Баланың сау-сәламәт тууы ана халәтенә бәйле булса да, табиблар туачак бала һәм минем өчен күп тырышлыклар куйдылар. Гинеколог Әлфия Зиннәтовна һәм акушерка Зөлфирә Шамилевна мине һәм баланы даими тикшереп тордылар. Безнең гаилә аларга бик тә рәхмәтле.

Тимофейны мин республика клиник хастаханәсенең перинаталь үзәгендә таптым”.  

Монда да Лияне табибларның профессинальлеге таң калдыра. Хирург, анестезиолог, башка медицина хезмәткәрләре кулы астында Лия Тимошаның тууын сизми дә кала.

Бүген инде ана гаиләнең күнеккән режимын Тимофей мәнфәгатьләреннән чыгып үзгәртергә мәҗбүр. “Яшермим, монысы минем өчен иң кыены”, - ди Лия.  Әмма балалар режим үзгәрүне генә түгел, кечкенә Тимоша хакына үзләре дә үзгәрергә әзер торалар, аны яраталар, мәктәптән сагынып кайталар.

Алексей һәм  Лия Камашевлар балаларын үз тормышларында иң зур бәхет дип саныйлар.

“Минем инде хәзер яшем дә бара, - дип дәвам итте сүзен Лия Камашева. -  Тимоша төпчек бала булып калырга мөмкин. Шуңа күрә мин аның һәр сулышын тыңлап ләззәтләнәм, кечкенә кулларын, аякларын үбүдән туктый да алмыйм. Ана өчен моннан да бәхетлерәк мизгелнең булуы мөмкин түгел. Аллаһы Тәгаләнең рәхмәте шулай буладыр, бәлки”

Энҗе ГӘРӘФИЕВА