Җиңү паркында беренче елка балкыды

Чыршы бәйрәме ул -  көтеп алынган, иң матур гаилә бәйрәме. Шуңа да бәйрәм тантанасына гаиләләре һәм балалары белән 500 дән артык кеше килгән иде. Балаларны бәйрәмнең төп геройлары Кыш бабай һәм Кар кызы каршылады. Паркта елка тирәли урнаштырылган берсеннән берсе матур сыннар бәйрәм кунакларының кәефен күтәрде. Әлеге сыннарны биектаулылар үзләре ясады.

Әлбәттә инде, бирегә килүчеләр өчен  бик күп сюрпризлар әзерләнгән иде.

“Яңа ел ул чын мәгънәсендә халык бәйрәме. Илдә, дөньяда сәяси вәзгыятьнең нинди булуына карамастан, Яңа ел бәйрәмен район җитәкчелеге күңелле итеп оештырырга тырышты. Безнең “Казан арты” паркы да, Җиңү паркы да, Биектау тимер юл станциясендәге үзәк сквер да бәйрәмчә бизәлде. Зур Кызыл урамның буеннан буена кар сыннары урнаштырылды. Халык күңеленә  Яңа ел рухы керсен өчен районның бюджет оешмаларында эшләүче талантлы хезмәткәрләр зур тырышлык күрсәтте. Балалар бакчаларында, мәдәният йортларында, мәктәпләрдә эшләүчеләр аеруча актив булды. Кар сыннары алар кулы белән ясалды. “Казан арты” паркында боздан ясалган сыннар югары профессионал дәрәҗәдә булулары белән аерылып тора.  Ул паркта чыршы бәйрәме 27 декабрьдә 17.00 сәгатьтә планлаштырыла”, - дип билгеләп үтте Биектау районы Башкарма комитеты рәисе урынбасары Ринат Сабирҗанов.

Шунысын да билгеләп үтәргә кирәк, районда мондый бәйрәмнәр төрле предприятиеләр, коммерцияле оешмалар һәм районның Башкарма комитеты ярдәме белән оештырыла. Шуңа да Яңа ел бәйрәме ел буена матур хәтирә булып балалар күңелендә саклана. Җиңү паркындагы елка янында  Кыш бабай белән Кар кызы балаларны берсеннән берсе мавыктыргыч уеннар белән шатландырды,  зурраклар төрле викториналарда катнаштылар, чыршы тирәли рәхәтләнеп биеделәр, җырладылар.  

 “Яңа ел минем өчен бик күңелле бәйрәм. Бүләкләр бәйрәме дә әле ул. Иң элек Кыш бабайга хат язарга кирәк. Гадәттә Кыш бабай мин теләгән бүләкне алып килә. Ә инде мин сораган бүләк кыйммәтлерәк булса, ул аны тагын да матурракка алыштыра ала”, - ди Әминә Батурина.

“Мин бу бәйрәмне бик яратам. Монда дуслар, танышлар бергә бәйрәм итә. Без барыбыз да бер түгәрәккә басып җырлыйбыз, уйныйбыз”, - дип сүзгә кушылды  Ясин Хашад.

Балаларның кәефләре югары, хәтта чиктән ашып тора. Алар үз хисләрен безнең микрофонга әйтергә дә атлыгып торды.

“Бу бәйрәмне мин дә бик яратам. Безнең гаилә бергә җыела. 2025 елны да без бергә каршы алачакбыз. Бу елка бик матур. Без монда кабат киләчәкбез әле”, - ди Максим Макаров та.

Максимның сүзләрен Ясминә Сафина да куәтләде: “Яңа ел – ул бәхет бәйрәме. Мин Яңа елда бүләкләр алырга яратам. Әлбәттә инде, елка бизәү, Кыш бабайны көтү мизгелләре бигрәк рәхәт”.

Яңа елны балалар гына түгел, олылар да көтеп ала.

“Яңа ел – ул гаилә бәйрәме. Бу бәйрәмдә барлык туганнар бергә җыела, рәхәтләнеп аралашасың. Ашыгыр җир юк -  ял итәсең. Балалар кебек Яңа ел төнендә могҗизалар көтәсең, килер көннең тагын да матур булуына ышанасың”, - ди Софья Һадиева.

Елка ачылу тантанасына килгән һәркем бәйрәм геройлары белән фотога төште, иң актив катнашучылар бүләкләр алды. Җиңү паркында узган бәйрәм беренчесе генә иде. 27 декабрь кичендә матурлык, могҗиза яратучы һәркем, “Казан арты” паркына килеп, кабат Яңа елның серле мохитен күзаллый ала.

Галия Ильдарова