Яңа ел бәйрәмнәре бары тик шатлык кына китерсен дисәк...

Шул вәзгыятьне истә тотып, Татарстан Республикасы Министрлар Кабинетының 2024 елның 29 нчы ноябрендәге  карары нигезендә,  2024 елның 25 декабреннән 2025 елның 8 гыйнварына кадәр янгынга каршы махсус режим гамәлгә кертелә.

Янгынга каршы көчәйтелгән режим чорында республикада, шул исәптән, Биектау муниципаль районында да, пиротехник эшләнмәләрдән тиешсез урыннарда кулланучыларны ачыклауга юнәлдерелгән чаралар үткәреләчәк.

Искәртеп үтәргә кирәк, янгынга каршы аерым тәртип гамәлдә булган вакытта 3 класслы хәвеф тудыра торган пиротехник әйберләрне куллануның үз кагыйдәләре бар. Аларны сәнәгать объектлары яннарыннан, транспорт инфраструктурасы уза торган юл буйларыннан һәм  ягулык -энергетика комплекслары (электр баганалары һәм электр линияләре уза торган җирләр) чикләреннән 500 метрдан да якынрак урыннарда куллану тыела.

Торак-коммуналь хуҗалыгы объектлары, авыл хуҗалыгы корылмалары, кешеләр күпләп җыела торган ял итү мәйданнары,  шәхси йортлар һәм күп фатирлы торак йортлар чикләреннән 30 метр ераклыкта гына  пиротехник әйберләрне кулланырга рөхсәт ителә. Билгеләнгән кагыйдәләрне бозган физик һәм юридик затлар  административ җаваплылыкка тартылачак. Җаваплылыкка тартылган физик затларга - 10 мең сумнан  20 мең сумга кадәр, вазифаи затларга – 30 мең сумнан 60 мең сумга кадәр, юридик зат булып теркәлмәгән эшмәкәрләргә - 60 мең сумнан  80 мең сумга кадәр, юридик затларга 400 мең сумнан 800 мең сумга кадәр штраф түләү каралган.

Хөрмәтлек биектаулылар!

Яңа ел һәм Раштуа бәйрәмнәре көннәрендә янгын чыгуның сәбәпләре күптөрле – кемдер электр җиһазларын күзәтүсез калдыра, кемдер газдан тиешенчә файдаланмый, кайберәүләр, өйдә  елка урнаштырып, аңа төсле электр гирляндалары элеп куя. Еш кына шулай була: гирляндалар кызып, елкага ут каба. Боларга өстәп, бәйрәм көннәрендә кайбер гражданнар, спиртлы эчемлекләр кулланып, уяулыкны югалталар, саклык чаралары күрергә кирәклекне оныталар. Шулай итеп, алар үзләренең һәм якыннарының гомерен куркыныч астына куялар. Статистик мәгълүматларга караганда, нәкъ менә ел башында, төгәлрәк әйтсәк, гыйнварның беренче ункөнлегендә янгын чыгу, шул янгында хәтта кеше үлү  очраклары еш кабатлана. Яңа ел алдыннан һәм Яңа ел төнендә халык күпләп пиротехник материаллар куллана. Алар белән эш иткәндә саклану чараларын төгәл үтәргә кирәк. Югыйсә, пиротехниканы шартлаткан вакытта янында басып торган кешеләр шактый гына зыян күрергә мөмкин.  

Яңа ел бәйрәмнәре гаиләләрегезгә бары тик шатлык-сөенеч кенә китерсен дисәгез, янгын куркынычсызлыгы кагыйдәләренә игътибарлы булыгыз.

Биектау муниципаль районы  буенча күзәтчелек эшчәнлеге һәм профилактик эшләр бүлеге башлыгы, эчке эшләр хезмәте подполковнигы Алексей Михайлович Разгулов