Иҗтимагый палата яңа инициатива тәкъдим итте

Мәктәп программасын тулыландыру тәкъдиме белән Россия Федерациясенең Иҗтимагый палатасы секретаре урынбасары Владислав Гриб чыгыш ясады. Ул хәзерге вакытта мәктәпләрдә әхлакый һәм эстетик тәрбия мәсьәләләренә җитәрлек игътибар бирелмәвен, әмма әлеге күнекмәләрнең баланың шәхес булып формалашуы өчен аеруча мөһим булуын билгеләп үтте.

Аның фикеренчә, укучылар академик белем белән генә чикләнергә тиеш түгел. Алар әдәп кагыйдәләрен, мәдәни аралашу күнекмәләрен дә үзләштерергә тиеш. Сүз бер тапкыр үткәрелә торган чаралар турында түгел, ә үз-үзеңне тоту кагыйдәләрен балаларның көндәлек тормышының табигый өлешенә әйләндерәчәк системалы эш турында бара.

Тәртип өчен билгеләрне кире кайтару белән бәйле

Бу инициатива 2026 нчы елның 1 нче сентябреннән мәктәпләрдә тәртип өчен билгеләр кире кайтарылу фонында аеруча әһәмиятле дип карала. Владислав Гриб сүзләренчә, балаларга алдан нәрсәнең яхшы, нәрсәнең начар булуын аңлатмыйча, аларның тәртибенә бәя бирергә ярамый.

«Әгәр без мондый билгеләрне кертәбез икән, мәктәп программасы кысаларында укучылар белән әдәп, эстетика һәм үз-үзеңне тоту кагыйдәләре турында сөйләшергә кирәк», — дип билгеләп үтте ул.

Тәртип өчен билгеләр кертү буенча пилот проект 2026 нчы елда берничә мәктәптә, шул исәптән Свердловск өлкәсендә дә, гамәлгә керә. Соңрак аны 2027 нче елга кадәр бөтен ил мәктәпләренә кертү күздә тотыла.

Белгечләр фикере һәм мөмкин булган куркынычлар

Иҗтимагый палатада әлеге инициативаны вакытлы һәм кирәкле адым дип саныйлар. Милли ата-аналар комитеты җитәкчесе Ирина Волынец сүзләренчә, бу сөйләм мәдәнияте кимүенә, сүгенү сүзләре куллануның артуына һәм кешеләр белән конструктив аралаша белмәүгә җавап булып тора. Аның фикеренчә, мондый дәресләр тупаслык аша хисләрне белдерү гадәтеннән арынырга һәм өлкәннәргә, яшьтәшләргә карата ихтирамлы мөнәсәбәт тәрбияләргә ярдәм итәчәк.

Шул ук вакытта белгечләр берничә куркынычка да игътибар итә. Алар фикеренчә, дәресләр формаль лекцияләргә әверелмәсен өчен, аларны җанлы сөйләшүләр һәм тренинглар форматында үткәрергә кирәк. Моннан тыш, бәяләү өчен ачык һәм аңлаешлы критерийлар булдыру, укытучыларны методик яктан әзерләү мөһим. Укытучы исә балалар өчен ышаныч уята торган шәхси үрнәк булырга тиеш.

Сораштыру нәтиҗәләренә караганда, катнашучыларның 67 проценты әдәп дәресләрен кертүне хуплаган, ә 33 проценты каршы чыккан. Каршы фикердәгеләр тәрбия белән иң элек ата-аналар шөгыльләнергә тиеш дип саный һәм бу мәктәпләргә өстәмә йөкләнеш китерәчәк дип белдерә.

Хәзерге вакытта инициатива карала. Әлеге курсны мәктәп программасына кертү турында соңгы карар Россия Федерациясе  министрлыгы һәм педагогик җәмәгатьчелек белән киңәшләшкәннән соң кабул ителәчәк.