Коркачык авылында күңелле ял иттеләр

Коркачык авылы мәдәният йортында үткәрелгән “Җырлы уен” чын мәгънәсендә зур бәйрәмгә әверелде. Авылыбызның  “Иске-Казан җәүһәрләре” һәм  кадерле кунакларыбыз, Ямаширмә авылының  “Чияләр” фольклор коллективлары көч сынашты. “Түгәрәк уен”, “Балкыш” фестивальләре лауреаты  булган ике команда да үзләренең  җырга-моңга бай, тапкыр һәм зирәк булуларын тагын бер кат расладылар. Йөгерек  бармаклы гармунчыларыбыз Ринат абый Гыйльметдинов белән Габдулла абый Мортазин, бәйрәм бизәге булып,  ямь өстенә ямь өстәделәр.  Бәйрәм чәй табыны  янында  киләчәккә планнар төзеп дәвам итте. Гармунчыларга һәм  ике коллективка да саулык-сәламәтлек, җан тынычлыгы, яңадан-яңа үрләр теләп  калабыз.

 Айгөл ХӘЙРУЛЛИНА