Россиядә Әтиләр көне ел саен октябрьнең өченче якшәмбесендә билгеләп үтелә. Быел ул 18 октябрьгә туры килә. Бәйрәм 2021 елда Россия Президенты Владимир Путин указы белән гамәлгә кертелде. Аның максаты — гаилә институтын ныгыту һәм балалар тәрбияләүдә әтиләрнең ролен ассызыклау.
Әтиләр көне ничек барлыкка килгән
Әтиләр көнен гамәлгә кертү тәкъдиме 2019 елда Екатеринбургта узган беренче Бөтенроссия әтиләр форумында яңгырады. 2021 елның июлендә Хезмәт министрлыгы указ проектын җәмәгатьчелек фикер алышуына тәкъдим итте, ә 4 октябрьдә Владимир Путин документка кул куйды. Федераль дәрәҗәдә бәйрәм гамәлгә кергәнче үк аны Россиянең 28 төбәгендә билгеләп үтәләр иде.
Мәктәпләрдә һәм балалар бакчаларында балалар әтиләренә открыткалар, кулдан ясалган бүләкләр әзерли, шигырьләр сөйли һәм җырлар өйрәнә. Шәһәрләрдә гаилә фестивальләре, спорт ярышлары һәм концертлар оештырыла. Бу көнне балалар тәрбияләүдә катнашучы әтиләрне генә түгел, бабайларны һәм үги әтиләрне дә котлыйлар. Әтиләр көне рәсми ял көне булып саналмый.
Әтиләр турында нәрсә билгеле
Бөтенроссия җәмәгатьчелек фикерен өйрәнү үзәге (ВЦИОМ) һәм «Җәмәгатьчелек фикере» фонды сораштырулары күрсәткәнчә, россиялеләрнең 67–71 проценты хәзерге әтине баласын күтәреп йөрүче яки аның белән балалар мәйданчыгында уйнаучы ир-ат итеп күз алдына китерә.
Респондентларның 71 проценты әтиләр балалар тәрбияләүдә актив катнаша дип саный. Сораштыруда катнашучылар фикеренчә, әтиләр балаларда иң элек батырлык (22 процент) һәм тәртип (21 процент) сыйфатларын тәрбияли. Халык санын алу мәгълүматларына караганда, Россиядә 12 миллионга якын әти яши, ә миллионнан артык ир-ат балаларын әниләреннән башка, мөстәкыйль тәрбияли.
Нет комментариев