Радиофобия аркасында элемтә станцияләре сүтелә

Татарстан Цифрлы үсеш министрлыгы коллегиясе утырышында ведомство җитәкчесе Илһам Начвин республикада телекоммуникация челтәрләрен үстерүгә «радиофобия» җитди комачаулый дип белдерде. Аның сүзләренә караганда, кайбер кешеләр кәрәзле элемтә станцияләреннән чыккан нурланыш сәламәтлеккә зыян китерә дип саный, әмма чынлыкта аның дәрәҗәсе көнкүреш техникасы эшләгәндә барлыкка килгән нурланышка тиң.

«Бу өйдә микродулкынлы мичне, телевизорны кабызудан яки телевизор пультын кулланудан курку белән бер», — дип билгеләп үтте министр.

Әмма нигезсез куркулар инде гамәли нәтиҗәләргә китергән: операторлар эшләп торган җиһазларны сүтәргә мәҗбүр, ә кайбер районнар элемтәсез кала.

Кайсы объектларга кагылды

Илһам Начвин хәбәр иткәнчә, Казанда Себер тракты буендагы 8 нче шәһәр хастаханәсе янында урнашкан база станциясе тулысынча сүтелгән.

Моннан тыш, федераль элемтә операторларының берсенә кайбер сәүдә үзәкләре янында база станциясе урнаштыру өчен рөхсәт бирүдән баш тартканнар. Шулай ук кайбер авыл халкы да кәрәзле элемтә манаралары урнаштыруга каршы чыга.

Радиофобия элемтә челтәрләре үсешенә ничек йогынты ясый

Белгечләр мәгълүматларына караганда, радиофобия — электромагнит кырларының реаль тәэсире белән турыдан-туры бәйле булмаган психоген күренеш. Кешеләр сәламәтлеккә зыян китерә алырлык дәрәҗәдән күпкә түбән нурланыштан да курка.

Шул ук вакытта база станцияләрен урнаштыру һәм файдалану санитария таләпләре нигезендә катгый көйләнә һәм Роспотребнадзор тарафыннан контрольдә тотыла. Бөтендөнья сәламәтлек саклау оешмасы да хәзерге вакытта радиодулкын кырларының озак вакыт дәвам иткән көчсез тәэсиренең сәламәтлеккә зыян китерүен раслаучы мәгълүматлар булмавын белдерә.

Демонтаж дәвам итсә, нәрсә булачак

Халыкның каршы чыгулары аркасында операторлар чыгымнар күрә, ә кайбер районнарда элемтәнең сыйфаты начарая. Татарстан Цифрлы үсеш министрлыгы халык белән аңлату эшләре алып барырга, нигезсез куркуларны киметергә һәм җиһазларны урнаштыру буенча уртак карарлар табарга ниятли.

Ведомство җитәкчесе муниципаль хакимиятләрне дә бу эшкә активрак кушылырга чакырды. Әгәр вәзгыять үзгәрмәсә, Казанның һәм республиканың башка торак пунктларының берничә микрорайоны тотрыклы мобиль элемтәдән һәм югары тизлекле интернеттан мәхрүм калырга мөмкин. Министрлыкта билгеләп үтүләренчә, бу шәһәрләр эчендә «цифрлы тигезсезлек» барлыкка килүгә китерергә мөмкин, ягъни кайбер районнарда элемтә булса, икенчеләрендә ул җитәрлек дәрәҗәдә булмаячак.