Иминият пенсияләрен индексацияләүнең яңа тәртибе

2027 нче елда картлык буенча иминият пенсияләрен арттыру тәртибе үзгәрәчәк. Гадәттәге бер тапкыр гыйнвар индексациясе урынына күтәрү ике этапта үткәреләчәк: беренчесе — 1 нче февральдә, икенчесе — 1 нче апрельдә.

Мондый тәртип законнарда беркетелгән булса да, соңгы елларда ул Яңа ел башыннан бер тапкыр индексацияләү файдасына вакытлыча туктатылган иде.

Февральдә пенсияләр узган елдагы фактик инфляция дәрәҗәсенә карап арттырылачак. Апрельдә исә өстәмә индексация Социаль фонд бюджеты керемнәренә бәйле булачак. Башлангыч исәпләүләр буенча, февральдә пенсияләр якынча 4 процентка, ә апрельдә тагын 3,4 процентка артырга мөмкин. Гомумән алганда, үсеш 7 проценттан артып китәчәк дип көтелә.

Индексациянең төгәл күләме 2026 нчы елның көзендә, Россия Хөкүмәте федераль бюджет проектына үзгәрешләр керткәннән соң билгеле булачак.

Социаль һәм хәрби пенсияләр

Социаль пенсияләрне арттыру тәртибе үзгәрмәячәк. Аларны, гадәттәгечә, 2027 нче елның 1нче апреленнән индексацияләячәкләр.

Хәрби хезмәткәрләрнең һәм аларга тиңләштерелгән категорияләргә караган гражданнарның пенсияләре 2027 нче елның октябрендә планлы индексация кысаларында арттырылачак.

Эшләүче пенсионерлар өчен пенсияне яңадан исәпләү

Эшләүче пенсионерлар өчен пенсияләрне яңадан исәпләү 2027 нче елның 1 нче августыннан үткәреләчәк. Өстәмә түләү күләме 2026 нчы елда эш бирүче күчергән иминият взносларына бәйле булачак, әмма ул өч пенсия балларыннан да күбрәк була алмаячак.

Шунысы мөһим: 2025 нче елдан башлап эшләүче пенсионерлар өчен пенсияләрне индексацияләү яңадан торгызылды. Шуңа күрә алар да февраль һәм апрель айларындагы индексацияне башка пенсионерлар белән бер үк тәртиптә алачак.

Аерым категорияләр өчен өстәмә түләүләр

Ел дәвамында элекке шахтерлар һәм очучылар өчен каралган өстәмә пенсия түләүләре дә яңадан исәпләнәчәк.

Барлык индексацияләрнең төгәл параметрлары 2026 нчы ел ахырындагы икътисади вазгыятькә карап төгәлләштереләчәк. Әмма пенсияләрне арттыру мәҗбүри характерда кала һәм бу карар буенча шик юк.