Россия Мәгариф министрлыгы мәктәпләрдә ясалма интеллектны куллануга кагылышлы методик тәкъдимнәр әзерләде.
Башлангыч һәм урта сыйныфлар өчен кагыйдәләр
1–4 нче сыйныф укучыларына мәктәптә ИИ-сервисларны мөстәкыйль куллану рөхсәт ителми. 5–9 нчы сыйныфларда укытучы рөхсәте белән нейрочелтәрләрне мәгълүмат эзләү, катлаулы төшенчәләрне аңлату һәм фаразларны тикшерү өчен кулланырга мөмкин. Әмма укытучы анализлау, дәлилләү һәм иҗади фикерләүне үстерүгә юнәлтелгән биремнәрдә ИИ куллануны чикли ала.
Югары сыйныф укучылары өчен мөмкинлекләр
10–11 нче сыйныф укучылары ИИны проект һәм тикшеренү эшләрендә дә куллана ала. Аларга зур күләмдәге мәгълүматларны анализлау, фаразлау модельләре төзү, исәпләүләрне автоматлаштыру һәм тикшеренү нәтиҗәләрен күрсәтү өчен визуаль материаллар әзерләү мөмкинлеге бирелә. Тәкъдимнәрдә әдәбият дәресләрендә нейрочелтәрләрне әсәр геройларының портретларын ясау яки текст өзекләрен тавышландыру өчен куллану мисаллары да китерелгән.
Экспертлар фикеренчә, бу чаралар технология мөмкинлекләре белән укучыларның мөстәкыйль фикерләүен таләп иткән белем бирү бурычлары арасында баланс сакларга ярдәм итәчәк. Документта нейрочелтәрләрне куллану мөмкинлекләре уку баскычына карап аерып күрсәтелгән. Моннан тыш, министрлык укытучыларга өстәмә чикләүләр кертү хокукын калдырган: педагог дәресләрдә һәм аерым биремнәрне үтәгәндә ИИ куллануны тыя ала.
Нет комментариев