Хәрби операциядәге якташлар бездән ярдәм көтә

Бу изге һәм игелекле эштән  районның мәгариф учреждениеләре дә читтә калмый. Чөнки махсус хәрби операция зонасында көрәшүче Россия солдатлары безнең ярдәмгә бик тә мохтаҗ. Аларга көнкүреш кирәк-яраклары, азык-төлек,  сугыш кырында үзләренең иминлеген   саклап калырга ярдәм итә торган киемнәр, механизмнар кирәк.

Районның барлык мәгариф учреждениеләрендә игелек ярминкәләре узды.  Ярминкәдә мәктәп укучылары, укытучылар, әти-әниләр катнашты:   кемдер камыр ризыгы пешергән, кемдер теккән кием һәм кулдан эшләнгән әйберләр алып килгән, носки, бияләйләр  бәйләгән,  ярминкә киштәсендә төрледән-төрле консервлаган ризыклар да мулдан иде. Товарларның күбесе төрелгән, бизәлгән, этикеткаларына кадәр ябыштырылган, бәясе күрсәтелгән. Бүгенге көндә бердәмлекнең әһәмияте аеруча мөһим. Авыр вакытта халыкның бердәм булып күтәрелүе илебезгә һәрвакыт көч бирде. Мәгариф учреждениеләре оештырган чарага  килгән һәркем балалар, укытучылар, тәрбиячеләр, әти-әниләр кулы белән эшләнгән әйберләрдән үзенә кирәклесен сайлап алды. Бу вакытта сатып алучы әйбернең бәясенә игътибар итми, чөнки аның күңелендә, игелек ярминкәсендә катнашып, сугыш кырында көрәшүче якташларыбызга аз гына булса да ярдәм итү теләге барлык кыйммәтләрдән дә көчлерәк.Уртак көч белән игелек ярминкәсендә барлыгы миллион сумнан артык акча җыелды. Бу акчалар махсус хәрби операция өчен техника сатып алырга тотылачак. Моннан 10 көн элек кенә район мәгариф учреждениеләре туплаган чираттагы гуманитар ярдәм хәрби зонага озатылган иде. Анда солдатлар өчен электрогенераторлар, бензин белән эшли торган пычкылар,  дизель җылылык  генераторлары бар иде. Чираттагы гуманитар ярдәм йөгендә дә кыш өчен кирәк-яраклар, азык-төлек тупланачак. Шулай ук, мәктәп һәм балалар бакчалары коллективлары солдатларга җылы носкилар, бияләйләр бәйлиләр, маскировка челтәрләре үрәләр, балалар солдатларга хатлар язалар.

Кыскасы, олысы-кечесе җиңүгә үз өлешен кертергә тели. Районның мәгариф бүлеге ярминкәдә актив катнашкан һәркемгә тирән рәхмәтен җиткерә.