Татарстанда җирләрдән файдалануның яңа кагыйдәләрен аңлаттылар

2026 елның 1 мартыннан Росреестр инициативасы белән кабул ителгән 295-ФЗ номерлы Федераль закон үз күченә керәчәк. Документ җир кишәрлекләреннән, шул исәптән урман фонды, авыл хуҗалыгы җирләрендә һәм мәдәни мирас объектлары территорияләрендә рөхсәт ителгән файдалану төрләрен билгеләгәндәге хокукый билгесезлекне бетерә.

Закон нинди документлар нигезендә файдалану төре билгеләнүен төгәлләштерә: болар — шәһәр төзелеше һәм урман хуҗалыгы регламентлары, шулай ук махсус сакланылучы табигать территорияләре турындагы нигезләмәләр. Шулай ук җирне, рөхсәт ителгән файдалану төренә бәйсез рәвештә, кулланырга мөмкин булган очраклар да беркетелгән.

Бу геодезия пунктларын урнаштыруга һәм капиталь булмаган корылмалар (киртәләр, хуҗалык блоклары, түбәләр) төзүгә кагыла. Моннан тыш, документ кишәрлекне файдалану төрен сайлауның аңлаешлы тәртибен кертә. Шулай ук файдалану төре регламент белән түгел, ә территорияне планлаштыру документациясе яки җир асты байлыкларыннан файдалану лицензиясе белән билгеләнә торган очраклар ачыклана.