«ФормАРТ» фестиваленә гаризалар кабул ителә башланды

2026 елда проект Россия халыклары арасындагы дуслыкны, татулыкны һәм үзара хөрмәтне ныгытуга багышлана. Яшь рәссамнар биш юнәлеш буенча үз эскизларын тәкъдим итә ала: «Россия халыкларының бердәм ритмда тормышы»; «Традицияләр берләштерә»; «Уртак миссия»; «Буыннар бәйләнеше»; «Россия — безнең уртак йортыбыз».

Катнашырга Идел буе федераль округында яшәүче 18 яшьтән 35 яшькә кадәрге һөнәри рәссамнар һәм һәвәскәрләр чакырыла. Гаризалар проект сайтында 3 майга кадәр кабул ителә. Бер кешедән — 3 эшкә кадәр. Фестиваль өч этапта уза: эскизларны сайлап алу, аларны шәһәр биналарында ясау һәм гомумроссия тавыш бирүе. Финал Киров шәһәрендә узачак. Җиңүчеләр 100 меңнән 200 мең сумга кадәр грантлар алачак.