Биш яшьлек Самат Татарстан күләмендә җиңеп чыкты

Бәйгедә мәктәпкәчә яшьтәге балалар, мәктәп укучылары һәм сәламәтлек мөмкинлекләре чикләнгән балалар катнашты.

Искәртеп үтәбез, әлеге бәйге, балаларны иҗади һәм иҗтимагый-агарту эшчәнлегенә җәлеп итеп, аларда экологик аң формалаштыру, республикабызның сирәк һәм юкка чыгу куркынычы астында булган үсемлек һәм хайван төрләрен саклап калу белән кызыксынуны үстерү максаты белән оештырылды.

Самат, кечкенә булуына карамастан, туган як табигате, андагы җәнлекләр, үсемлекләр белән кызыксына. Бу юнәлештә аңа әнисе Рузилә ярдәм итә. Самат табигать турында бик озак һәм кызыклы итеп сөйләргә ярата. Чөнки ул кайда гына булмасын табигатьне күзәтә, теге яки бу күренеш турында әнисенә йөз төрле сораулар бирә, тулы җавап алмыйча сорау бирүдән туктамый. Гаиләдә Самат рәссам да, дизайнер да, табигать сакчысы да. Малай кул эшләренә бик оста. Аның инде җанварлар һәм үсемлекләр сурәтләнгән бик күп кул эшләнмәләре бар. Бу эштә дә Саматка әнисе ярдәм итә. Әмма иҗат барышында малай инициативаны тулысы белән әнисенә тапшырмый, барлык процессларны үзе күзәтеп, кимчелекләр булса, төзәтеп, кулдагы әйбер камиллеккә ирешкәнче эшне туктатмый. Саматның мондый сыйфаты «Мин һәм Кызыл китап» республика бәйгесендә җиңеп чыгарга этәргеч бирде.

“Без әни белән Кызыл китапны карап, танышып чыктык, - ди Самат Шәйхиев. – Миңа ярканат бик тә ошады. Минем аны  бәйге өчен эшләп карыйсым килде”.

Самат кыргый җәнлекләр һәм  динозаврлар белән дә кызыксына. Ярканатны үз күзләре белән күрергә хыяллана. Әлегә китаптан аның холкы, сыйфаты турында кызыксына. Ярканат та кыргый хайван икәнлеген, көндез йоклап,  ә төннәрен ауга чыкканын бик  яхшы белә малай.

Бәйге эше өчен кирәкле материалларны Самат үзе әзерли. Урамга һава суларга  дип чыккан вакытта да ул үзенең барлык кесәләрен нарат күркәсе, яфраклар, төрле сурәттәге чыбыклар кебек  табигый материаллар белән тутырып керә.

“Без гаиләбез белән табигатьне яратабыз, - ди Саматның әнисе, Дөбьяз балалар бакчасы тәрбиячесе  Рузилә Шәйхиева. – Үземнең дә яраткан шөгылем – кул эшләре. Балалар кайда гына булсалар да минем иҗат өчен табигый  материал җыялар. Кечкенә генә ботакка да,  агач кисәгенә дә җан өрәләр, аларда нинди дә булса җәнлек, я кош күрәләр. Миңа балаларымның мондый гадәте бик ошый. Чөнки алар табигатьне яратып, аны сакларга өйрәнеп үсәләр”.

Рузилә  – күп балалы ана. Саматтан башка аның тагын ике кызы бар.  Кызлары да, төрле бәйгеләрдә катнашып, призлы урыннарны алганнар. Рузилә Шәйхиева үз балаларына гына түгел, бакчада тәрбияләнүче барлык балаларга да туган як табигатенә мәхәббәт уята, балаларда  үзләре яши торган җирлек белән горурлану хисләре тәрбияли.

«Мин һәм Кызыл китап» республика бәйгесендә быел 3,5 мең бала катнашты.

ТР Биоресурслар буенча дәүләт комитеты балалар кул эшләнмәләре бәйгесендә җиңүчеләрне игълан итте инде. Декабрь аенда җиңүчеләрне бүләкләү тантанасы узачак.

Энҗе Гәрәфиева