Айбашта мәдәният йорты ачылды

Социаль яктан бик күп мөһим объектлар - балалар бакчалары, мәктәпләр, фельдшер-акушерлык пунктлары, спорт заллары һәм мәйданчыклары, мәдәният йортлары ачу Татарстан Республикасы көненә бүләк булды.

Бу мәсьәләдә безнең Биектау районы да калышмый. Шушы көннәрдә авыл халкы, шулай ук бөтен район яңа йортларга һәм учреждениеләргә күчүне бәйрәм итте.

Айбашта мәдәният йортын ачу тантанасында "Казан Кремле" музей-тыюлыгы директоры Зилә Вәлиева, ТР Дәүләт Советы депутаты Разия Садыйкова, Биектау муниципаль районы башлыгы Рөстәм Кәлимуллин катнашты. Бәйрәмгә Айбаш авыл җирлегенә караган авылларда яшәүчеләр дә килде. Биектау артистлары еракта урнашкан авыл өчен озак көтелгән вакыйганы җырлары һәм гармуннарда уйналган дәртле көйләре белән билгеләп үттеләр.