Бала чакта алган белем – ташка язган сүз белән бер

Суыксу авыл китапханәсендә балалар һәм яшүсмерләр китабы атналыгы барышында төрледән-төрле чаралар үткәрелде.

Китап укучы балалар белән «Саекмас рухи чишмә» дигән китап сөючеләр конкурсы матур итеп оештырылды. Анда әкияттән өзекләр укып, кайсы әкият икәнлеген әйтергә; мәкальләрнең башын әйтеп, ахырын тәмамларга; табышмак дигән сүздән кем күпме сүз яза ала; тизәйткечләрне кем буталмыйчарак әйтә ала кебек биремнәр булган иде.

«Пөхтәлекне, чисталыкны, һәрвакыт яратабыз!» дигән әдәплелек дәресләре дә игътибарны җәлеп итте. Бу көнне мәктәптә, өйдә һәм урамда үз-үзеңне тәртипле тоту; ничек итеп чисталыкны саклау; өс һәм аяк киемнәрен һәрвакыт чиста, пөхтә йөртү; әйләнә-тирәбезне чистартып тору турында сөйләнде.

Атналыкның өченче кө-нендә «Сүз эчендә энҗе бар» дип исемләнгән табышмаклар кичәсе үт-кәрелде. Балаларга төрле темаларга кагылышлы табышмаклар әйтелде, кем тизрәк җавап бирә, шуңа бер балл куелды. Һәр ярышта да 4 нче сыйныф укучысы Сәйфуллин Булат җиңүче булды. Икенче урынны 3 нче сыйныф укучысы Хәкимҗанов Азат яулады. Беренче генә сыйныфта укуына карамастан Сәйфуллина Динә дә абыйларыннан калышмаска тырышты. Ул өченче урынга чыкты. Балаларга истәлекле бүләкләр тапшырылды. Атнаның калган көннә-рендә балалар белән кычкырып укулар оештырылды, дисктан әкият-мультфильм карадылар һәм төрле уеннар уйнадылар. Шәһәрдән авылга кунакка кайткан балалар да бик теләп бу чараларда катнаштылар. Балаларның мәктәптән тыш вакытлары күңелле һәм файдалы узды.