Спортчыларыбыз сынатмады

Ноябрьнең беренче атнасы спорт вакыйгаларына бай булды.

Балалар-үсмерләр спорт мәктәбе тренеры Павел Ивановта тәрбияләнүчеләр рус шашкалары буенча Татарстан Республикасы беренчелегендә яхшы чыгыш ясадылар. Карина Дудкина, Рөстәм Хафизов, Наил Хәбибуллин икенче урыннарны алдылар, Айсылу Әхмәтсафина өченче призер булды, ә Илүзә Сафина үз яшь категориясендә дүртенче урынга чыкты.

Балалар-үсмерләр спорт мәктәбе тренеры Ирина Миндрюковада тәрбияләнүчеләр дә үзләрен яхшы яктан күрсәттеләр. Алар өстәл теннисы буенча "Татарстан Республикасының өметләре" ("Надеҗды Республики Татарстан") республика ярышларында катнаштылар. Динар Солтанбеков дүртенче урынга күтәрелде, ә Лия Волкова авыл спортчылары арасында җиденче булды.

Балалар-үсмерләр спорт мәктәбе тренерлары Станислав Тюрин һәм Альберт Сибгатуллинда тәрбияләнүчеләр дә 1999-2000 нче елда туган үсмерләр арасында мини-футбол буенча Татарстан Беренчелегендә мактаулы өченче урынны яуладылар.