Луговая урамында күңелле өй туе

Россия көнендә Биектау авылында утыз гаилә яңа квартиралар алды. "Социаль ипотека" программасы буенча төзелгән бу матур йорт Луговая урамында урнашкан.

Биш этажлы яңа матур йортка күчү бәхете елмаючылар арасында бер Бөек Ватан сугышында катнашучы, өч фронтовик толы һәм бюджет өлкәсендә эшләүчеләр бар. Район башлыгы Рөстәм Кәлимуллин квартиралы булучыларны икеләтә бәйрәм - Россия көне һәм тормышларындагы шушындый мөһим һәм шатлыклы вакыйга белән ихлас күңелдән котлады. Ветераннар исеменнән солдат толы - Әлдермеш авылыннан Маһирәҗәп Хәйруллина район һәм республика җитәкчеләренә чын йөрәктән чыккан рәхмәт сүзләрен белдерде.