Шырпы кабы кадәр блокада икмәге

Биектау районында ел саен әлеге истәлекле датага багышланган чаралар уза. Агымдагы атнада «Блокада икмәге» дигән акция узды. Аны Биектау районы Туган якны өйрәнү музее “Бердәм Россия” сәяси партиясенең җирле бүлеге белән берлектә оештырды. Аны оештыручылар район үзәгендәге узып баручыларга 125 әр грамм ипи тараттылар. Ленинград блокадасы вакытында шәһәр халкына нәкъ шул күләмдә ипи биргәннәр. Акция барышында блокада фаҗигаләре тасвирланган листовкалар өләштеләр.

“Өч елга якын дәвам иткән газап, ачлык, җан өшеткеч суык, бомбага тотулар, үлем. Ватаныбызның шушы куркыныч көннәре истәлегенә багышланган акция үсеп килүче буында илебез тарихындагы героик сәхифәләрнең берсе - Ленинград блокадасы вакыйгалары белән таныштыру максатыннан уздырылды”, - ди «Бердәм Россия» сәяси партиясенең җирле бүлеге башкарма секретаре Лилия Надиенко.

“Күзләремә яшьләр килде хәтта, - дип, сүзгә кушылды акцияне үз күзләре белән күргән Әлфия Насыйбуллина. - Бөек Ватан сугышында, аерым алганда, Ленинград өчен барган сугышта, Җиңү һәм киләсе буыннарга тыныч тормышны саклау өчен миллионлаган ватандашыбыз үз гомерен корбан иткән. Блокада өзелүгә 76 ел вакыт үтте. Шунысы куандыра, әлеге вакыйгаларны яшьләр белә. Минем кызым сыйныфында батырлык сәгате узды. Балалар блокада икмәгенең шырпы кабы кадәр күләмдә генә булганын күреп, уйга баталар. “Блокадада яшәүчеләр миңа бик тә кызганыч булды, - ди кызым”.

Гыйнвар ахырында районның барлык мәгариф учреждениеләрендә Бөек Ватан сугышының иң фаҗигале чорына багышланган батырлык сәгатьләре, тематик лекцияләр уздырыла.

Галия ИЛДАРОВА