Алар туган як кырларының иркенлеген, тынычлыгын уяу саклыйлар

Башкалар кебек үк, Исмәгыйль Шәймәрданов өчен бу үзенчәлекле бәйрәм. Дусларын сыйларга үзбәкчә пылау пешерергә дип ул иртәнге сәгать 5тә үк торып баскан. Бәйрәм чаралары узганнан соң алар дуслары белән бергә җыелачаклар.

- Чик сакчылары өчен иң куркыныч җәза - заставадан алу. Шуңа күрә миңа шундый карар кабул итәчәкмен, дип әйтү дә җитте һәм барлык күрсәтмәләрне күз ачып йомганчы эшләп тә куялар иде. Берәүнең дә үзен чик буеннан алдырасы килмәде, - дип сөйләде Исмәгыйль Шәймәрданов.

Исмәгыйль Кавказ арты чик буе округында хезмәт иткән. Ул Совет-Иран чик буе участокларының берсендә застава начальнигы булган. Шәймәрданов чик буеның бик тә үзенчәлекле урын булуы, анда бер-береңә ярдәм кулы сузу һәм җаваплылыкның гаять мөһим икәнлеге турында сөйләде. Чик буенда хәрби бурычын үтәүчеләрнең һәркайсы өчен дә аның әһәмияте хезмәткә караганда да зуррак була.

- Минем турыда кайгырткан хатыныма рәхмәт. Кайвакыт киемнәрне бер дежур торганда 5-6 шар тапкыр алыштырырга туры килде, чөнки яңгыр астында кием бик тиз юешләнә. Чик буенда хезмәт итүче алдына катлаулы бурычлар куела. Биредә хезмәт итүчеләр гомергә дуслашалар. Чик буен саклагандагы халәтне, ул чактагы хисләрне сүзләр белән генә аңлатып та булмый, - дип өстәде Исмәгыйль Шәймәрданов.

Биектау районының чик сакчылары яшьләрне тәрбияләүгә үзләреннән зур өлеш кертәләр. Алар мәктәп балалары белән әңгәмәләр уздыралар, кыр өйрәнүләрендә катнашалар. Бәйрәмнәрдә хезмәт иткән вакытта җырлаган җырларын искә төшерәләр. Яшь буын белән тыгыз элемтәдә торганнары өчен чик сакчыларын район Башлыгы исеменнән грамоталар белән бүләкләделәр.

- Кайда яшәвегезгә карамастан, сезнең очрашуларга килүегез, бергә җыелуыгыз шатлыклы күренеш. Бу юлы биектаулылар күп, кемнәрдер Балтачтан, Казаннан да килгәннәр. Быел һөнәри бәйрәм - Чик сакчылары көнен билгеләп үтәргә йөзләп кеше җыелды, - дип сәламләде чик буе сакчыларын Биектау районының хәрби комиссары Александр Найденов.

Күбесе очрашуга балаларын да алып килгәннәр. Туган ил алдындагы бурычын үтәгәннәргә бездә һәрвакыт хөрмәт белән карауларын алар күреп, аңлап үссеннәр.

Галия ИЛДАРОВА