Биектау кызы Мәскәүдә узган Халыкара бәйгедә Лауреат исеменә лаек булган

2 нче Биектау урта мәктәбе укучысы, "Балкыш" балалар иҗаты йортына йөрүче Азалия Хөсәенова Мәскәү шәһәрендә "Мәскәү вакыты" дип аталган Балалар һәм үсмерләр иҗаты Халыкара конкурс-фестивалендә катнашып, "Нәфис сүз" номинациясендә I дәрәҗә Лауреат исеменә лаек булды. Фестиваль 13-15 гыйнвар көннәрендә узды.

Азалия конкурс программасы кысаларында Ирина Пивоварованың "Сочинение" хикәясен сөйләде. Талантлы кызны нәфис сүз буенча бәйгегә укытучысы Йолдыз Шакирова әзерләгән.
Тагын шунысын да әйтеп китәргә кирәк, Азалия "Мандарин" бию студиясенә биергә йөри һәм КВН командасы әгъзасы да.

Иҗади кызга һәртөрле уңышлар телибез!