Россия көнендә яшь биектаулылар паспорт алдылар

Россия көнендә - 12 июньдә Җиңү паркында бәйрәм концерты булды. Район җитәкчеләре исеменнән биектаулыларны бәйрәм белән башкарма комитет җитәкчесе урынбасары Люция Гобәйдуллина котлады. Ул һәркемгә дә ирешелгәннәрне сакларга һәм Туган илне яратырга киңәш итте.

Артистлар чыгышы алдыннан районның яшь гражданнарына паспортлар тапшырылды. Унике биектаулы паспорт алды. Концерт райондагы мәдәният йортларының үзешчән сәнгатьтә катнашучылары көче белән әзерләнгән иде. Алар илебез халыкларының җырларын һәм биюләрен башкардылар. Тамашачылар сәхнәгә чыккан һәркемне алкышлап каршы алдылар.