Күршеләр белән тату яшибез

Биектау районының авыл җирлекләре башлыклары 1 августта күршедәге Марий Эл республикасының Бәрәңге районында булдылар.

Әлеге район белән безнең дуслык күптәннән дәвам итә. Бу төбәктә яшәүчеләрнең яртысын үзләренең телләрен, гореф-гадәтләрен, мәдәниятен, милли үзенчәлекләрен саклаган татарлар тәшкил итә. Күршеләр безнең делегацияне җылы каршыладылар, шәһәр тибындагы Бәрәңге поселогының игътибарга лаеклы матур урыннарын, соңгы вакытта төзелгән социаль һәм мәдәни объект-ларны күрсәтеп чыктылар. Бәрәңге районы башлыгы Әлфәт Ибраев районның икътисадый үсеше, биредә яшәүче халыклар - татарлар, марилар һәм русларның мәдәни традицияләрен саклаулары турында сөйләде. Авыл җирлекләре башлыклары шулай ук Бәрәңге районы авылларында федераль программа буенча төзелгән күп функцияле белем бирү учреждениесендә, табиблык пунктында, балалар бакчасында булдылар.