БЕРГӘ ЭШЛӘГӘНДӘ ЯХШЫ

Дүшәмбе көнне Бөреле авыл җирлегендә хокук тәртибе бозуларга профилактика темасына гражданнар җыены булды. Аңа җәнлек совхозы поселогында яшәүчеләр генә түгел, ә бәлки авыл җирлекләре башлыклары, район оешмалары җитәкчеләре, мәктәп директорлары, башкарма комитет бүлекләре начальниклары һәм белгечләре дә чакырылды. Җыелышта Биектау муниципаль районы башлыгы урынбасары Раушан Хәйруллина, Россия Эчке эшләр бүлегенең "Биектау" муниципальара бүлеге начальнигы урынбасары Фәнис Хәйдәров катнашты. Бөрелеләрнең чыгышлары балалар бакчасында, урта мәктәптә, амбулаториядә профилактик чаралар оештыруга кагылды. Башкарылган эш турында участок вәкиле, полиция өлкән лейтенанты Иван Рошка хәбәр итте.