Александр Найденов: “Без сезне гаҗәпләндерергә тырышырбыз”

- Биектау районында, күптәннән гадәткә кергәнчә, без бәйрәм итеп кенә калмыйбыз, ә бәлки парад уздырабыз. Һәм бу беренче генә ел түгел. Табигый, әлеге парадка без ел саен ниндидер яңалык кертергә, яңа юнәлеш бирергә, яңача оештырырга, техниканы яңартырга тырышабыз.

Ә быел исә парадның төзелеше дә үзгәртеләчәк. Моннан алдагы елларда - безнең чараларга йөрүчеләр беләдер - без, үзебезнең мемориал яныннан узып, Пролетар урамыннан райпо ягына китсәк, быел хәрәкәт маршрутын үзгәртергә булдык. Төп вакыйга Биектау районы Башкарма комитеты бинасы каршындагы скверда булачак. Маршрут бераз борылып, үзгәреп китәчәк. Биредә без тамашачыларга утырып торырлык урыннар әзерләргә планлаштырабыз. Андый урыннар 1 меңләп булачак, аннары баскан килеш карап торырга да урыннар җитәрлек булыр. Әлеге парадта катнашачак оешмалар, предприятиеләр үз техникаларын алып киләчәк. Тагын нинди дә булса сәнгать чыгышы әзерләячәкләр. Бу парадта бары техника һәм чыгышларда катнашучылар гына узачак. Монысы безнең төп яңалыгыбыз. Тагын шунысын да әйтәсе килә, техниканың яңа элементлары да булачак. Әмма шулай да чарабызның төп серләрен әлегә ачып бетермим. Ә менә техниканың яңа элементлары гына түгел, ә бәлки өр-яңа мәдәни чыгышлар да тәкъдим ителәчәген әйтә алам.

- Аңа ел буе әзерләнәбез. Ягъни оешмалар һәм предприятиеләр техника әзерлиләр, программа төзиләр. Ә инде төп һәм көчле әзерлек бер айлап элек башланды. Җыеп кына әйткәндә, игътибарны җәлеп итәрлек күп кенә кызыклы нәрсәләр булачак. Салютлар да, техникадан атулар да. Биектаулылар барысы да бәйрәмгә рәхим итсеннәр! Килегез, үкенмәссез, күп яңалыклар белән танышырсыз. Һәм без сезне гаҗәпкә калдырырга тырышырбыз. Гаиләләрегезне, балаларыгызны алып килегез. Мәйдан очрагына туры китереп бизәләчәк, бәйрәмгә килүчеләр тамашаны күзәтеп кенә түгел, ә бәлки тамак та ялгап ала алсын өчен махсус кухня да эшләп торачак. Быел шулай ук кичке салют та күздә тотылды. Бәйрәм чаралары кич буе дәвам итәчәк.