Высокогорские вести
  • Рус Тат
  • Ерак сәфәргә чыгар алдыннан

    Иртәгә иртән - 27 сентябрьдә Биектау районыннан бер төркем кеше хаҗ кылырга Согуд Гарәбстанына барырга юлга чыгачак. Хаҗ кылырга җыенучылар белән ерак сәфәр алдыннан район үзәге мәчетендә район башлыгы Рөстәм Кәлимуллин очрашты. - Хаҗ кылу - зур эшкә тотыну, зур бәхет бу, - диде ул, - җыелучыларга мөрәҗәгать итеп. -...

    Иртәгә иртән - 27 сентябрьдә Биектау районыннан бер төркем кеше хаҗ кылырга Согуд Гарәбстанына барырга юлга чыгачак. Хаҗ кылырга җыенучылар белән ерак сәфәр алдыннан район үзәге мәчетендә район башлыгы Рөстәм Кәлимуллин очрашты.

    - Хаҗ кылу - зур эшкә тотыну, зур бәхет бу, - диде ул, - җыелучыларга мөрәҗәгать итеп. - Юлда авырлыклар да очрар инде, шуңа күрә барыгызга да әлеге сынауларны узарга әзер булырга кирәк. Иң мөһиме - сабырлык, түземлелек. Үземнән беләм, кеше хаҗдан, рухи яктан да, физик яктан да ныгып, рухланып кайта, хәтта фикерләр дә үзгәрә. Ходай Тәгалә сезгә шундый изге сәяхәткә бару мөмкинлеге бирә икән, димәк, хәерле эшләрегез, күркәм ниятләрегез бар. Догаларыгызда үзегезнең районыгызга, кече туган илегезгә иминлек, бәрәкәт, яшьләрнең инсафлы булуын теләгез. Хаҗда кылган һәр дога Ходай Тәгалә тарафыннан кабул ителә. Сәфәрегез имин үтсен, исән-сау әйләнеп кайтыгыз.

    Район башлыгы Рөстәм Кәлимуллин Хаҗга барачак 14 кешенең һәркайсына, юлга кирәкле дарулар-медикаментлар алсыннар өчен, матди ярдәм акчасы салынган конвертлар тапшырды. Җыелучылар җылы сүзләре, матур теләкләре һәм ярдәме өчен район башлыгына рәхмәт әйттеләр.

    • Безне шушындый мөһим сәяхәткә әзерләүләре өчен район, республика җитәкчеләренә рәхмәт, - диде Юртыш авылыннан килгән Фәридә Насыйрова. - Мәккәгә барырга беренче тапкыр җыенуым. Әниемне 103 яшенә кадәр тәрбияләдем. Күрәсең, аның догалары Ходай Тәгаләгә барып ирешкәндер һәм ул миңа хаҗ кылу мөмкинлеге биргәндер. Анда районыбызның иминлеге өчен дә дога кылырбыз.
    • Безнең Семиозеркада мәчет юк иде. Аны төзергә урын зур кыенлыклар белән район башлыгы Рөстәм Галиулла улы ярдәмендә генә табылды. Рәхмәт сезгә. Хәзер безнең авылдан 9 кеше Хаҗга барды инде, менә әле дә без Семиозеркадан өчәү, - диде Наҗия апа.

    Абыйлы-сеңелле Гөлназ белән Айрат Җиһаншиннар да Семиозеркадан. Алар - яшь буын вәкилләре. Гөлназ Казанда Мөхәммәдия мәдрәсәсендә белем ала.

    • Безнең гаиләдә элегрәк барысы да Хаҗга барган кешеләр. Шушы изге җиргә аяк баса алуымнан үземне бик бәхетле сизәм, - диде Гөлназ.

    Бөреледән Наилә Шәмиева - урта буын вәкиле. Сәяхәткә барырга җыенган арада хаҗ кылучылар үзара танышып та өлгергәннәр һәм ерак юлда бер-берсенә булышырга әзер торалар.

    Хаҗ кылучыларга матур юл теләкләре белән Биектау район үзәге мәчете имам-хатыйбы Фәрит хәзрәт Шәрәпов һәм Биектау мәчете имам-мөхтәсибе Тәлгать хәзрәт Гайфуллин да мөрәҗәгать итте.

    Шимбә көнне иртән район автобусы хаҗ кылырга баручыларны Казан аэропортына илтеп куячак. Хәерле юллар сезгә!

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: